Bo sa ken bo ta?
Bo sa kiko bo ta para pe?
Bo ta konsiente di e diferensha ku bo ta hasi den bida di kada hende ku ta rondonabo, di un of otro manera?
Bo konose bo abilidatnan?
Bo tin konfiansa den bo kapasidatnan?
Bo sa kiko bo ta nifiká pa otronan?
Bo sa bo balor?
Bo balor komo ser humano.
Bo balor komo ser stimá.
Bo balor komo un alma pasahero den e bida aki.
Probablemente, bo kontesta riba mayoria di e preguntanan aki ta “nò.”
Kasi sigur bo ta pone mas atenshon riba e ambishon pa ta perfekto, ku riba e pasonan di adelanto ku ta parti di bo transformashon.
Kasi sigur bo ta torturá bo mes pensando riba tur lokual a bai robes, na luga di selebrá kada triunfo, kada obstákulo ku bo a logra superá.
Probablemente bo dudanan tin mas poder riba bo, ku e elogionan ku bo meresé pa kada reto ku bo a superá.
I kisas e realisashon ku bo ta sperando no ta yega for di bo mes.
Pero SÁ.
Sá ku bo ta wordu mirá.
Sá ku bo ta wordu apresiá.
Sá ku bo ta wordu balorá.
Sá ku bo ta wordu rekonosé.
Bo ta un fuente di inspirashon.
Bo ta un ehempel di fortalesa.
Bo ta digno di atmirashon.
Kisas bo mes no ta mira tur esaki ainda.
Pero otronan sí.
P’esei…
Na luga di kuestioná bo mes, kuminsá elogiá bo mes.
No ta tur hende tin e kurashi pa sali for di nan comfort zone.
I ta solamente ora bo sali for di bo comfort zone, bo ta duna bo mes e oportunidat pa sigui krese, sigui i sigui transformá.
Sea humilde, pero no priva bo mes di rekonosé bo balor.
Keda ku bo kabes firme.
Wanta bo integridat.
Sigui bo intuishonnan.
Sea fiel na bo stem interno.
I mientras bo ta balorando bo mes, bo logronan i kiko bo ta para pe, wanta bo ego i arogansia leu.
Bo no tin ku bira mas grandi ku otronan pa rekonosé ku abo ta grandi.
Bo no tin ku kompará bo kaminda ku esun di ningun otro hende.
Bo solamente tin ku rekonosé bo mes.
Pues, si a kaso abo no por a kontestá bo mes tur e preguntanan ariba…
Mi ta spera ku e palabranan aki a yudabo mira un tiki mas kla.
Kisas ta ora pa bo stop di duda.
Stop di kuestioná.
Stop di skonde.
Sali padilanti.
I kuminsá selebrá.
No solamente selebra e gran triunfonan.
Selebrá e pasonan chikí.
E retonan ku bo a superá.
E momentonan kaminda bo a sigui, apesar di ku bo no tabata sigur kon.
Selebrá e hende ku bo a bira durante e kaminda.
Ami sí sa ken bo ta.
I pa esaki, bo ta risibí un standing ovation di rekonosementu i orguyo.
Sigui padilanti, den gradisimentu.
Paso ta solamente ora nos ta konsiente di unda nos a sali, i nos ta para un momentu pa mira kiko tur nos a logra, nos por sigui riba nos kaminda di bida.
Mas konsiente.
Mas sigur.
Mas iluminá.
I mas bendishoná.
Bo tin un futuro ku ta briya i e ta wardabo. Firme, ku konfiansa, sabiendo Ken Bo Ta!
— Simply Su